إشراقة نيوز: محمد الحرشي
ضحكت
حتى بانوا ضراسي
والعقل ما فراسي
قالوا لي
إلى درت الأسنان
يكمل عقلي
اتزاد فهمي
كبرت في الحومة
كملوا سناني
ما كبر عقلي
مافهمت اهلي
وحتى جيراني
——
دخلت المدرسة
نتهجا بزز
سنان فمي تكزز
بحال ماكينا
ناشفا
خاوية شحمة كريس
ولا زيت موتور معاودة
لمعلم يضرب
لا تهجا
لا تعطل
فالجواب
أش ندير
سناني مراكبا خلقة
مصدية
ما حن علي
ما شفق
على فمي لمفاكم
الضحكة غايبة
القسوة حاضرة
تبولك فالسروال
اولاد لفشوش
اقشبوا عليك بالعرمة
——
آه كبروا اسناني
ما كبر عقلي
خرجوا مايلين
ناقصهم الدنتفريس
والشيتا معدن
من سوق لافيراي
سد فمك
ما تبان سوسة
ما باين عواج
تنجا من التصىرفيق
والدقة
——
لبنات يعجبهم السنان
البيضا ما فيها كلكير
ما فيها كحولة فاخر
نكلس جنب الحيط
ساد فمي
امخبي قهري
حاني راسي
ستر عيبي
——
دخلت الخدما
ناقص ضحكة
ناقص فم عامر
طاحوا الضروس رزمة
الأسنان مرة مرة
النياب رشاو
من قلة العضان
اش هاد الوعد
يا حزقان
——
اسناني مريا مكسرة
تبين طرف وجهي
تعوج الطرف لآخر
الزلط يطيح اللسان
حكرة قوق حكرة
سد فمك
ما تكلم ما تقرا
ما تخدم خدمة زينا
ما تعلى
مدابز مع وجهك
مع نفسك
مع عمرك
ماتبين سنانك
حتى تموت
اوتفنى
قم بكتابة اول تعليق